Paketa fiskale 2027! TVSH bie direkt mbi konsumatorin, me rritjen e kostove, biznesi i vogël do të rrisë dhe çmimet

Ulja e TVSH-së për produktet bazë të shportës mund të sjellë një rënie të çmimeve me rreth 10-12% në muajt e parë të vitit 2027, ndërsa ndryshimet në skemën e TVSH-së për bizneset dhe profesionet e lira mund të ndikojnë në rritjen e kostove të disa shërbimeve. Kështu u shpreh eksperti i ekonomisë Klodian Muça, në një intervistë për emisionin “7pa5” në Vizion Plus, me moderatore Brikena Prifti, ku diskutoi efektet e pritshme të paketës fiskale për vitin e ardhshëm.

Sipas Muçës, ulja e TVSH-së për produktet e shportës është një masë e diskutuar prej afro 30 vitesh, por ndikimi i saj në çmimet për konsumatorët mund të jetë më i ulët se 14%, shifra që është përmendur si pritshmëri. Ai argumentoi se përvoja e vendeve të tjera europiane tregon se uljet e çmimeve mund të jenë më të dukshme në fillim, por me kalimin e kohës tregtarët mund të ndryshojnë çmimet. Megjithatë, eksperti vlerësoi se konsumatori do të jetë përfituesi kryesor i kësaj mase, veçanërisht familjet me të ardhura të ulëta dhe shtresat më vulnerabël.

Nga ana tjetër, Muça paralajmëroi se ulja e pragut të xhiros vjetore për përfshirjen në skemën e TVSH-së, nga 10 milionë në 5 milionë lekë, mund të prekë një numër të konsiderueshëm biznesesh dhe profesionistësh të lirë, përfshirë avokatë, inxhinierë, arkitektë, stomatologë dhe mjekë. Sipas tij, rritja e kostove mund të reflektohet në çmimet e shërbimeve që u ofrohen qytetarëve. Ai përmendi gjithashtu propozimet për rritjen e tatimit mbi të ardhurat nga kapitali nga 15% në 17% dhe të tatimit mbi dividendin nga 8% në 15%, duke theksuar se ndikimi përfundimtar në çmime do të varet edhe nga konkurrenca dhe kontrollet në treg. Muça nënvizoi se paketa mund të ndihmojë në lehtësimin e kostos së konsumit, por efektet e saj duhet të vlerësohen në raport me ndryshimet që do të pësojnë shërbimet e tjera.

/vizionplu.tv