Një pjesë e madhe e Shteteve të Bashkuara po përballet me të ftohtë ekstrem pas kalimit të një stuhie të fuqishme dimërore, e cila ka shkaktuar dhjetëra viktima, ka lënë miliona qytetarë pa energji elektrike dhe ka paralizuar transportin ajror. Ndërkohë, një tjetër valë e acartë pritet gjatë fundjavës, duke shtuar shqetësimet për pasoja edhe më të rënda.
Sipas një bilanci të përpiluar nga AFP mbi të dhënat e autoriteteve lokale dhe mediave amerikane, të paktën 38 persona kanë humbur jetën si pasojë e kushteve ekstreme të motit, në aksidente ose nga hipotermia. Mes viktimave janë edhe tre fëmijë në Teksas, të cilët humbën jetën pasi ranë në një liqen të ngrirë, ndërsa në Nju Jork u gjetën të paktën dhjetë persona të pajetë në hapësira të jashtme.
#LiveUpdates: US Winter Snow Storm- Snow, sleet and perilously cold temperatures sweep eastern two-thirds of country as thousands of flights grounded. pic.twitter.com/l9jVeJTCPO
— Gopal Sengupta (@senguptacanada) January 25, 2026
Stuhia ka shkaktuar ndërprerje të mëdha të energjisë elektrike, veçanërisht në jug të vendit, përfshirë Tenesin, Teksasin, Misisipin dhe Luizianën. Deri të martën në mbrëmje, rreth gjysmë milioni familje dhe biznese vazhdonin të ishin pa rrymë, sipas të dhënave të PowerOutage.com.
Situata ka krijuar kaos edhe në transportin ajror. Aeroporte të mëdha si ato të Uashingtonit, Filadelfias dhe Nju Jorkut kanë pezulluar pjesërisht funksionimin, ndërsa mbi 22 mijë fluturime janë anuluar që nga e shtuna. Vetëm të dielën u anuluan më shumë se 9 mijë fluturime, një shifër rekord që nga fillimi i pandemisë së COVID-19.
Sipas meteorologëve, temperaturat do të mbeten nën zero në shumë shtete veriore deri të dielën, ndërsa një sistem i ri i ftohtë nga Kanadaja mund të sjellë reshje të reja shiu ose bore në bregun lindor të SHBA-së. Autoritetet paralajmërojnë se disa zona, sidomos në jug, nuk janë të përgatitura për kushte kaq të ashpra dimërore, duke rritur rrezikun për pasoja të tjera serioze.
