Ish-gjyqtari Alaudin Malaj i ka cilësuar të turpshme ndryshimet në Kodin Penal. I ftuar këtë të martë në studion e Quo Vadis, të moderatores Pranvera Borakaj, në Vizion Plus, Malaj tha se këto ndryshime po hapin më shumë burgje, duke e kthyer Shqipërinë në diktaturë.
Malaj tha se edhe më e rëndë është e drejta që i jepet policëve, gjyqtarëve apo prokurorëve për të hetuar bizneset.
Pjesë nga biseda:
Malaj: Kjo, si iniciativë e mazhorancës, ka katër vite. Ishte një legjislacion prej 500 faqesh. Unë mendoj se mazhoranca duhet të tërhiqej.
Borakaj: Si duken ndryshimet?
Malaj: Kjo është një nga gjërat më të turpshme. Sot kemi një kryeministër që është i shqetësuar për njerëzit në burg. VBE i ka bërë thirrje që Shqipëria futet te vendet diktatoriale. Ky ligj që kërkon të sjellë në Parlament sjell më shumë burgje, më shumë të paraburgosur.
Borakaj: Çfarë kriminalizon?
Malaj: Që nga parkimi i makinës, te sharja, te fyerja. Nuk po hy te fyerja, sepse po çel anarki të re në sistem. E dyta, kjo është një lloj uzurpimi i biznesit privat në Shqipëri. Sot çdo lloj prokurori, gjyqtari e polici mund të hetojë dhe të bllokojë këdo nga bizneset private. Mund të bëjë edhe bashkëpunëtorë stafet.
Borakaj: Pa pasur indicie?
Malaj: Indicie ka gjithmonë. E vetmja gjë që më rëndon është se si ka mundësi që në vitin 2026 të mendohet ta bëjmë shtet edhe biznesin privat.
