Sekuestrohen pasuritë kriminale të ish-drejtorit të Postës në Korçë, Valter Gora.
Specialistët për Hetimin e Krimit Ekonomik-Financiar në Drejtorinë Vendore të Policisë Korçë vendosën sekuestro preventive ndaj një prone në qytetin e Pogradecit, konkretisht lokal shërbimi, në pronësi të 41-vjeçarit.
Ky i fundit është arrestuar në datën 14 korrik të këtij viti për veprat penale “Shpërdorimi i detyrës” dhe “Falsifikimi i dokumenteve”, kryer në bashkëpunim.
“Nga hetimet e kryera, dyshohet se të ardhurat e paligjshme të përfituara nga aktiviteti kriminal i shtetasit V. G., janë investuar në blerjen e këtij ambienti, i cili ishte në përdorim të filialit të Postës Shqiptare (i lëshuar me qira). Vijon puna për të verifikuar dhe evidentuar pasuritë e tjera, që mund të jenë në emër të 41-vjeçarit V. G. dhe bashkëpunëtorëve të tjerë të tij”, njoftoi policia.
