Kandidati për Qarkun e Korçës, Ervin Salianji u takua këtë të premte me një familje që ndodhet në kushte të vështira ekonomike.
Zonja e shtëpisë tregon se bashkëshorti i saj, i cili është diagnostikuar me një sëmundje të rëndë, kurohet me para të marra borxh. Po ashtu, ajo ankohet se i kanë ndërprerë energjinë elektrike prej tre muajsh, pasi nuk kanë të ardhura për t’i paguar.
“Kam burrin të sëmurë me kancer në mushkri. Kam dy vjet që i kam bërë kartat e KEMP-it dhe nuk e kam marrë. Tani sa erdha nga spitali, nesër kam për të shkuar prapë në spital. Bën 5 herë insulinën, sa herë që shkojmë në spital ai duhet të ushqehet por çfarë ti jap unë. Pa drita jam pa ngrohje jam. Dritat na i kanë prerë. Unë s’kam të paguaj, vetëm 30 mijë lekë asistencë marr. Me 30 mijë lekë çfarë mund të bëhet? Ja shikoni me qiri. Ilaçet nuk kam me çfarë t’ia marr”, shprehet zonja e shtëpisë.
“Kam 15 vite i sëmurë. Tani sapo erdha nga spitali. Më thonë hajde nesër, hajde nesër. Unë nuk eci dot as nga këmbët se mi ka shkatërruar diabeti. Taksi i bëra lekët. Marr borxh që iki në spital me taksi. Pa drita po bëj gati 4-5 muaj”, shtoi kryefamiljari
Salinji premtoi se pas 25 prillit gjendja e kësaj familjeje, por edhe e familjeve të tjera që jetojnë në këto kushte, do të ndryshojë.
“I sëmurë edhe pa drita? Ne do t’ju ndihmojmë. Do vijmë sërish t’ju takojmë këtu në shtëpi. Do ta ndjekim rastin dhe do t’ju ndihmojmë me kempin dhe me energjinë elektrike. Na mbështesni këtë herë dhe do t’ju ndihmojmë.”
