Tirana është e vetmja bashki ku në vitin 2023 u rishikuan çmimet e referencave për pasuritë e paluajtshme, ndërsa 60 bashkitë e tjera ende operojnë me çmimet e vitit 2016.
Sot rivlerësimi në 60 bashki po bëhet pa pasur në fuqi referencat e reja për pasuritë e patundshme.
Gjatë një konference për shtyp, Ministri i Financave, Petrit Malaj, deklaroi se një grup pune ka marrë përsipër finalizimin e çmimeve të referencës për pjesën tjetër të territorit të Shqipërisë brenda muajit prill 2026.
Ai sqaroi se vonesa lidhet me dallimet midis çmimeve të regjistruara në zyrat e kadastrës fiskale dhe çmimeve që rezultuan nga kontrollet në terren në zyrat imobiliare.
“Për shkak të këtyre diferencave, u mblodh grupi i punës për të përcaktuar çmimet reale të tregut. Procesi i rivlerësimit nuk ka përfunduar ende,” tha ministri.
Malaj: Çmimet e reja të referencës për pjesën tjetër të territorit të Shqipërisë janë ende në proces për t’u finalizuar. Një grup pune ka marrë përsipër ta finalizojë këtë proces brenda muajit prill 2026. Arsyeja pse u shty në kohë me çmimet, ishte sepse si rezultat i punës së bërë nga grupi i punës u vërejtën diferenca mes çmimeve që janë të regjistruara pranë zyrave të kadastrës fiskale dhe çmimeve që rezultonin nga kontrollet që u u ushtruan në terren në zyrat imobiliare. Për shkak të kësaj diference u mblodh grupi i punës për të përcaktuar se kush janë çmimet reale të tregrimit, procesii i rivlerësimit nuk ka përfunduar. Të gjithë qytetarët shqiptarë që jetojnë në qytete të tjera mund të bëjnë rivlerësimin e pronës me një vlerësues privat.
Në këto kushte, qytetarët në rrethe që kërkojnë të rivlerësojnë pronën e tyre, rrugën me më shumë leverdi kanë atë me një ekspert të licencuar, që i jep vlerën e tregut pasurisë. Ndryshe nga Tirana, ku qytetarët mund të zgjedhin mes rivlerësuesit të licencuar dhe çmimeve të referencës të vitit 2023 për pronën e tyre./vizionplus.tv
