Kryeministri Edi Rama në një intervistë për televizionin “Francë 24” ka folur për disa prej çështjeve më të rëndësishme në vend, situatën politike, reformën në drejtësi, luftën kundër kanabisit, por edhe zhvillimet e fundit në rajon. Ai nuk sheh asgjë dramatike në protestën e opozitës në çadër, por thotë se Shqipëria ka ende për të mësuar për çështjet e komunikimit.
I pyetur për reformën në drejtësi, Rama shprehu keqardhjen qe opozita nuk e gëlltit dot vetingun dhe hodhi poshtë akuzat e saj se qeveria do të kapë drejtësinë.
Ndërsa kujtoi se kanabisi është një problem i trashëguar dhe i pandëshkueshëm në të kaluarën, Rama tha se mafia nuk është vetëm shqiptare.
Kryeministri sqaroi gjithashtu se shkarkimi i ministrave të qeverisë u bë për arsye reformatimi, ndërsa vlerësoi progresin e Shqipërisë në luftën kundër korrupsionit.
Duke folur për zhvillimet në rajon e veçanërisht në Maqedoni, Rama theksoi se shqiptarët atje janë etnitet dhe kërkojnë respektimin e të drejtave të tyre.
Teksa komentoi edhe nisjen e procesit te Brexit, shefi i qeverise u shpreh se ndryshe nga Britania, për Shqipërinë, integrimi ne BE është rruga drejt një shteti modern.
