Ish-deputetja e Partisë Demokratike, Orjola Pampuri akuzon kryeministrin Edi Rama se ka nisur të sulmojë mjekët që dëshmojnë se spitalet janë të tejmbushura, duke shtuar se sjellja e tij me bluzat e bardha që përballen me virusin meritojnë përbuzjen.
Përmes një postimi në “Facebook”, Pampuri shprehet se qytetarët e infektuar me COVID që kurohen në shtëpi shpenzojmë shumë para dhe se qeveria nuk iu siguron rimbursimin e ilaçeve.
Ndër të tjera, demokratja shtoi se pacientët dhe familjarët e tyre, janë përballur sot me radhë të tejzgjatur në pritje të lirimit të një shtrati tek COVID 1.
“Edhe sot, pacientët dhe familjarët e tyre u përballen me radhët e tejzgjatura në pritje të lirimit një shtrati tek COVID 1. Mbi 10 ambulanca në pritje janë fotografia e dështimit të Edi Ramës me pandeminë. Në vend që të bëjë diçka për të lehtësuar qytetarët, Edi Rama ka nisur të sulmojë mjekët që dëshmojnë të vërtetën, se spitalet janë të tejmbushura. Sot, çdo mjek dhe punonjës i shëndetësisë ndihet i fyer, i braktisur dhe i indinjuar nga sulmi i padenjë që Edi Rama u ka bërë dy mjekëve të shkëlqyer Arjan Mezini dhe Genc Sulçebe. Sjellja e tij me mjekët që përballen direkt me virusin meriton përbuzje. E vërteta e pohuar prej tyre nuk fshihet dot nga propaganda e Edi Ramës, i cili i do mjekët pa zë dhe pa kurajo për të folur. E vërteta që pohojnë mjekët është se pacientët e infektuar me COVID-19 duhet të presin jashtë nëpër ambulanca që të lirohet një shtrat dhe të futen ata. E vërteta që mjekët pohojnë është se qytetarët duhet të presin 10 ditë për një tampon. E vërteta që mjekët pohojnë është se qytetarët që kurohen në shtëpi shpenzojmë shumë parà, pasi qeveria e dështuar nuk rimburoson asgjë. Edi Rama mund të fyejë, shajë, mallkojë, mashtrojë, por nuk e fsheh dot të vërtetën dhe nuk i intimidon dot profesionistët që të thonë atë që shohin çdo ditë- dështimin e Edi Ramës me pandeminë dhe sistemin shëndetësor.”
