Kryeministri Edi Rama, gjatë një komunikimi live në Facebook, ka folur mbi aksionin në vijim për lirimin e hapësirave publike, duke iu përgjigjur kritikave se ndërhyrjet përbëjnë një goditje ndaj bizneseve.
“Bëhet fjalë për struktura të çmontueshme dhe në shumicën e rasteve ka mirëkuptim nga ana e sipërmarrësve. Po i çmontojnë vetë. Ka dhe përjashtime, por ky nuk është një sulm ndaj aktivitetit sipërmarrës,” tha Rama.
Ai theksoi se qeveria është duke përgatitur një rregullore kombëtare që do të përcaktojë qartë kufijtë dhe hapësirat që mund të përdoren, duke respektuar interesin e komunitetit.
“Do të ketë hapësirë për të gjitha njësitë tregtare, por pa kapërcyer kufirin që u përket qytetarëve,” tha ai.
Rama u ndal edhe te roli i teknologjisë në këtë proces.
“Shqipëria ka bërë përparim të jashtëzakonshëm dhe është vlerësuar si një nga yjet në ngjitje në Europë për reformat dhe transformimin. Teknologjia do të na ndihmojë të kalojmë në një fazë të re, ku nuk do të ketë më abuzime me ndërtimet informale. Ajo do të na çlirojë nga ky fenomen,” u shpreh Rama.
Rama tha gjithashtu se lirimi i hapësirave publike nuk është një nismë e përkohshme apo sezonale, por pjesë e një programi afatgjatë.
“Rilindja urbane 2.0 është një program që do të zgjasë katër vjet dhe ky proces do të jetë konstant. Nuk është aksion apo sulm veror,” përfundoi Rama, duke iu përgjigjur kritikave për kohën e ndërhyrjeve.
/vizionplus.tv
