FIFA po përballet me një “blackout” televiziv të Kupës së Botës që mund të prekë më shumë se një të tretën e popullsisë së planetit. Në problemin më të fundit për drejtuesit në Zyrih, aktualisht nuk ekziston asnjë marrëveshje transmetimi për turneun as në Kinë dhe as në Indi.
Kjo do të thotë se tifozët e futbollit në dy vendet më të populluara të botës rrezikojnë të mbeten jashtë spektaklit më të madh futbollistik në planet. FIFA kërkoi 74 milionë paund për të drejtat televizive të transmetimit të turneut në Indi, një rritje prej 67 për qind krahasuar me koston e Botërorit “Katar 2022”.
Megjithatë, oferta më e lartë deri tani për transmetimin, nga “Reliance-Disney”, ishte më pak se 15 milionë paund dhe ende nuk është arritur asnjë marrëveshje.
Ndërkohë, në Kinë ende nuk është shpallur asnjë partner transmetimi, edhe pse kanë mbetur vetëm pesë javë nga starti i turneut në Meksiko Siti më 11 qershor. Kjo ndodh pavarësisht faktit se Botërorët e mëparshëm janë transmetuar nga rrjeti shtetëror CCTV, i cili ka një shtrirje shumë të madhe brenda territorit kinez.
Së bashku, Kina dhe India kanë një popullsi të kombinuar prej më shumë se 2.8 miliardë banorësh nga gjithsej 8.2 miliardë njerëz në botë.
Edhe pse asnjëri prej këtyre vendeve nuk konsiderohet treg i madh televiziv në krahasim me tregjet kryesore europiane, FIFA, e drejtuar nga Xhiani Infantino, është e dëshpëruar të zgjerojë ndikimin global të futbollit.
Një nga problemet për tifozët indianë është se shumica e ndeshjeve që do të zhvillohen në SHBA, Kanada dhe Meksikë do të luhen në mes të natës sipas orës lokale, pasi Mumbai është katër orë e gjysmë përpara Londrës. Interesi për futbollin në Indi ende zbehet përballë kriketit, ndërsa finalja e IPL është planifikuar të luhet më 31 maj, vetëm 11 ditë para nisjes së Kupës së Botës.
Ndërsa në Kinë, edhe pse vlerësohet se ka rreth 200 milionë tifozë të futbollit, kolapsi praktik i Superligës kineze ka bërë që transmetuesit televizivë të jenë më pak të gatshëm të investojnë shuma të mëdha parash.
