Trump sulmon sërish Zelenskyn: Ukraina nuk na ka dhënë asgjë në këmbim të ndihmës amerikane
Presidenti amerikan Donald Trump ka ashpërsuar sërish kritikat ndaj Ukrainës dhe homologut të tij, Volodymyr Zelensky, duke deklaruar se Kievi nuk ka dhënë asgjë në këmbim të mbështetjes së madhe financiare dhe ushtarake nga Shtetet e Bashkuara.
“Ne i kemi dhënë shumë Ukrainës. Ata nuk na kanë dhënë asgjë. Mbajeni mend këtë”, deklaroi Trump të hënën, përpara gazetarëve në Uashington.
Deklaratat e tij vijnë në një moment tensionesh mes dy vendeve, pasi presidenti ukrainas ka shprehur shqetësimin për vonesat në furnizimin me armatime amerikane, veçanërisht me raketat e mbrojtjes ajrore Patriot.
Sipas një raportimi të medias amerikane Axios, Zelensky është ankuar se Uashingtoni ka pezulluar dërgesat e armëve. Presidenti ukrainas thuhet se i ka ngritur këto shqetësime gjatë një takimi virtual me senatorë amerikanë nga të dyja partitë.
Sipas transkriptit të takimit, të cituar nga Axios, Zelensky ka deklaruar se sekretari amerikan i Mbrojtjes, Pete Hegseth, nuk po miraton dërgesat e raketave Patriot dhe të municioneve të tjera për mbrojtjen ajrore, megjithëse disa vende anëtare të NATO-s kanë paguar tashmë për to.
“Këto zhvillime tregojnë se është marrë një vendim politik për të ngadalësuar mbështetjen ndaj nesh”, thuhet të ketë deklaruar Zelensky.
Edhe The Washington Post raportoi se vonesat kanë prekur dërgesat e armëve nga partnerë të tjerë të Ukrainës, të cilat kërkojnë miratimin paraprak të Uashingtonit për shkak se janë prodhuar në SHBA.
Nga ana tjetër, një zyrtar i lartë i Departamentit amerikan të Mbrojtjes ka kundërshtuar raportimet për ndryshime në furnizimin me armë.
Sipas agjencisë gjermane të lajmeve DPA, zyrtari deklaroi se nuk ka ndryshime në programin përmes të cilit vendet e NATO-s blejnë armë amerikane për Ukrainën.
Ai shtoi se e njëjta gjë vlen edhe për shkëmbimin e informacioneve të klasifikuara.
