Gjatë vizitës në Qendrën Sociale “Jonathan”, një nënë që kujdeset për një fëmijë me aftësi të veçanta i kërkoi kryeministrit Edi Rama që përveç sigurimeve shoqërore dhe shëndetësore, kujdestarët të mund të përfitojnë edhe një pagë minimale.
Në përgjigje të saj, Rama tha se çështja është diskutuar dhe se qeveria do të shqyrtojë mundësitë për këtë kategori, duke marrë parasysh nevojat e familjeve që kujdesen për fëmijët me aftësi të veçanta.
“E diskutova atë ditë që bëmë miratimin, që të shikojmë mundësinë për këtë kategori, duke pasur parasysh se këto janë të ardhura që i administrojnë prindërit. Do të shikojmë mundësinë edhe të indeksimit, që siç bëjmë indeksimin e pensioneve, të bëjmë edhe indeksimin e ndihmës për fëmijët me aftësi të veçanta, që të mos goditeni nga inflacioni”, tha Rama.
Kryeministri u shpreh se rritja e mbështetjes për grupet në nevojë lidhet me rritjen e mundësive ekonomike dhe të ardhurave të shtetit.
“Të gjitha këto që janë bërë, janë bërë jo se ju erdhi koha të bëhen dhe nuk duheshin bërë përpara, por sepse janë rritur mundësitë. Që të bëjmë më shumë duhet të rrisim më shumë mundësitë, që të rrisim mundësitë duhet të rrisim ekonominë, që të rrisim ekonominë duhet të rrisim investimet”, deklaroi kryeministri.
Rama theksoi se mbështetja sociale do të vijojë të jetë pjesë e politikave të qeverisë, duke mohuar se masat e ndërmarra lidhen me periudha elektorale.
“Dua t’ju siguroj se është shumë e rëndësishme që ju të jeni në dijeni të faktit që ne nuk e kemi këtë gjë as me sezone, as me fushata, e kemi konstante. Ishte një zotim që e morëm, ju thamë që do ta bëjmë dhe e bëmë”, u shpreh Rama.
