Moti sot: Temperatura deri në 38°C, reshje të dobëta në disa qarqe
Shqipëria do të vijojë të jetë nën ndikimin e motit kryesisht të qëndrueshëm edhe gjatë ditës së sotme, megjithëse në disa zona të vendit priten reshje të dobëta shiu.
Sipas parashikimit të Institutit të Gjeoshkencave, reshje të dobëta priten në qarqet Elbasan dhe Korçë, ndërsa në Kukës, Dibër, Lezhë, Berat dhe Gjirokastër reshjet do të jenë lokale dhe me intensitet të ulët. Në pjesën tjetër të vendit nuk parashikohen reshje.
Temperaturat do të mbeten të larta, duke arritur deri në 38°C në zonat e ulëta.
* Bregdeti: 22°C – 34°C
* Zonat e ulëta: 21°C – 38°C
* Zonat malore: 16°C – 33°C
Era do të fryjë e lehtë deri mesatare në pjesën më të madhe të territorit. Në bregdet dhe në zonat malore priten intervale me forcim të përkohshëm të erës, duke arritur lokalisht intensitet të fortë.
