Vendi ynë do të ndikohet sot nga kushte atmosferike të paqëndrueshme. Sipas Shërbimit Meteorologjik Ushtarak, moti parashikohet me vranësira mesatare deri të dendura në të gjithë territorin.
Reshjet e shiut do të nisin në orët e mesditës përgjatë vijës bregdetare me intensitet të ulët, ndërsa pas mesditës do të përfshijnë të gjithë vendin, duke u shfaqur me intensitet të ulët deri mesatar. Në zonat veriperëndimore dhe jugperëndimore, reshjet do të fitojnë hera-herës intensitet deri të lartë, në formën e shtrëngatave afatshkurtra.
Në zonën e Alpeve priten reshje dëbore me intensitet deri mesatar. Në verilindje dhe lindje, dëbora do të shfaqet në lartësitë mbi 800–900 metra, ndërsa në juglindje mbi 1000–1100 metra, me intensitet të ulët.
Era do të fryjë nga drejtimi juglindje–jugperëndim me shpejtësi mesatare rreth 8 m/s, ndërsa përgjatë vijës bregdetare dhe në zonat luginore pritet të arrijë deri në 20 m/s. Valëzimi i detit do të jetë i forcës 4–6 ballë.
Temperaturat maksimale do të arrijnë deri në 19°C, ndërsa minimalet zbresin në 0°C në Bajram Curr, dhe rreth 1°C në Korçë dhe Peshkopi.
/vizionplus.tv
