Këshilli i Ministrave ka caktuar këtë të mërkurë që të vendosen 1 mijë mësues shtesë për të përballuar nevojat gjatë pandemisë në vitin shkollor 2020-2021.
Ministrja e re e Arsimit, Evis Kushi shkruan se ajo diskutoi me drejtuesit e drejtorive rajonale për mbarëvajtjen e vitit shkollor, teksa shprehet se i falenderoi për përballimin me sukses të nisjes së procesit mësimor. Ajo iu kërkoi që të kenë përkushtim maksimal në respektimin e masave anti-COVID.
“1,000 mësues shtesë për të përballuar nevojat për punonjës arsimorë gjatë periudhës së pandemisë në vitin shkollor 2020-2021, u miratua sot me vendim të Këshillit të Ministrave. Me këtë lajm e nisa sot takimin me drejtuesit e drejtorive rajonale dhe zyrave vendore arsimore, me të cilët diskutuam mbi mbarëvajtjen e vitit të ri shkollor 2020-2021 dhe zgjidhjen e shqetësimeve të shfaqura gjatë kësaj periudhe. Në këtë kuadër, i falënderova për përballimin me sukses të nisjes së vitit të ri shkollor dhe kërkova që akoma me më tepër përkushtim të mbajnë në vëmendje maksimale respektimin e masave anti-COVID në çdo institucion arsimor, si dhe të shtojnë përpjekjet dhe inspektimet në terren në mënyrë që të garantohet se #rregullat zbatohen nga të gjithë. Sa më rigorozë që të jemi në këtë aspekt, aq më e lehtë do të bëhet edhe sfida jonë e përbashkët për të kujdesur për shëndetin e nxënësve, mësuesve, prindërve e kujtdo tjetër, dhe njëkohësisht të sigurojmë mbarëvajtjen e procesit mësimor në këtë vit jo të lehtë shkollor,” shkruan Kushi.
