Ministri britanik i Punëve të Jashtme, Boris Johnson u shpreh sot gjatë një vizite në Lindjen e Mesme se qeveria e tij ishte pro një zgjidhjeje me dy shtete në konfliktin izraelito-palestinez.
Kjo vizitë vjen pasi ardhja e Donald Trump në Shtëpinë e Bardhë shpërndau pasiguri mbi përpjekjet ndërkombëtare për zgjidhje të këtij konflikti prej disa dekadash.
“Politika e qeverisë sonë është absolutisht e pandryshuar”, deklaroi Johnson për median në Ramallah pas takimit me ministrin palestinez të Punëve të Jashtme, Riyad al-Malki.
”Ne mbetemi të angazhuar për një zgjidhje me dy shtete, me këtë vizion për zgjidhjen e këtij konflikti. E mendoj vërtetë se kjo është e mundur”, u shpreh ai.
Kreu i diplomacisë u shpreh se kishte besim që administrata e re në Uashington do të paraqiste një “mundësi”.
