Ibrahimoviç var “këpucët në gozhdë”, lamtumira e “mbretit” suedez emocionon “San Siro-n”

Lot dhe emocione në ceremoninë e lamtumirës nga futbolli i luajtur për Zlatan Ibrahimoviç në “La Scala-n” e futbollit Italian, San Siro. Klubi dhe populli milanist i kishte përgatitur kampionit të madh suedez një ceremoni të veçantë, si për t’i shprehur mirënjohjen e thellë për gjithçka Zlatan ka dhënë për fanellën e Milanit dhe në tërësi për kontributin e tij të madh në futboll. Pas 25 vitesh karrierë si futbollist profesionist, ku fitoi thuajse gjithçka, Ibrahimoviç vari këpucët në gozhdë në moshën 42-vjeçare, vendim normal për moshën dhe jo vetëm edhe për shkak të dëmtimeve të konsiderueshme në sezonin e fundit. Pikërisht për këtë arsye, në duelin e fundit kundër Veronës ai doli në tapetin e San Siros jo me kostumin e ndeshjes me numrin e 11, por drejtuesit e Milanit ia stampuan këtë fanellë përjetësisht. Zlatan mes lotësh konfirmoi se do të vazhdoj të jetë i lidhur profesionalisht me Milanin, ku me gjasë mund të marrë post. Suedezi është padiskutim ndër më të mëdhenjtë e dekadave të fundit. Ai e nisi karrierën tek Malmo, klubi i tij i parë në Suedi përpara se të kalonte tek gjigandët holandezë të Ajax, ku u bë blerja më e shtrenjte në histori në atë kohë. Kapelo e nuhati talentin e tij dhe e mori tek Juventus ku e ktheu në makineri golash edhe në serinë A, pavarësisht se për shkak të skandalit të Calciopolit u detyrua të transferohej tek Inter, aty ku fitoi kampionate duke kapur majat, të cilat e detyruan Barcelonën ta blinte për një transferim rekord në 2009. Përshtatja me ambientin atje ishte e keqe, ndaj u kthye në Itali këtë herë tek Milan, ku ishte protagonist i madh i kampionatit të fituar, përpara se kriza financiare e Milanit ta detyronte të shkonte tek PSG . Shpejt u kthye ne mbretin e Parisit, një idhull dhe lider i padiskutueshëm. Më pas vitet e tranzicionit tek Manchester United dhe Los Anxhelos Galaksi përpara se te rikthehej tek klubi, të cilin ai thotë se e dashuron më shumë se çdo gjë tjetër, Milani..Erdhi në momentin më të dobët, por ishte protagonist me gola në sezonin e titullit edhe pse 40-vjeç. Në karrierën e tij është shpallur 12 herë lojtari suedez i vitit. Ka fituar trofe e ka shënuar gola pa fund, ka fituar simpati e ka krijuar gjithashtu antipati pa fund, por me siguri i njihet merita e një bomber dhe e një lideri që rrallë i vjen futbollit.