Autoriteti Kombëtar i Ushqimit ka konfirmuar se ushqimi i servirur nga kompania Sori-Al ka helmuar studentët e Akademisë së Sigurisë. Në bazë të analizave të ISUV, AKU njoftoi se janë marrë 9 mostra tek ushqimet e kësaj kompanie, ku në një prej tyre është konfirmuar prania e baktereve të rrezikshme për shëndetin e kosnumatorëve.
Sipas njoftimit zyrtar, analizat treguan se makaronat ishin me ngarkesë mbi normë të bakterit Escherichia.Coli dhe B staphylococcus.
Pas këtyre gjetjeve AKU shprehet se në bazë të kontrolleve të tjera që ka ushtruar në Garnizonin Skenderbej, ambjente që Sori-Al përdorte për gatimin për studentët e Akademisë ka rezultuar se ka qënë jashtë kushteve të higjenës.
Autoriteti i Kontrollit Ushqimor nënvizon se janë marrë masa për ndërprerjen e aktivitetit të subjektit SORI-AL. Gjithashtu u vendos masë administrative me gjobë në vlerën 15 mln lekësh të vjetra për ushqim të pasigurt dhe kushte jot ë mira higjieno-sanitare. Ndër të tjera, AKU shton se subjektit iu la detyrë marrja e masave për kryerjen e procedurës së asgjësimit referuar produktit të bllokuar.
Hetimi për skandalin e helmimit të 56 studentëve të Akademisë së Sigurisë po bëhet nga policia dhe prokuroria e Tiranës. Administratorja e kësaj kompanie Alma Tafani pas disa ditësh në arrati, është paraqitur në Prokurorinë e Tiranës ku ka dhënë dëshminë e saj në lidhje me këtë skandal. Ajo po hetohet në gjëndje të lirë.
Më herët policia arrestoi edhe kuzhinierin e kompanisë Kujtim Ballgjini dhe Kristjana Plaka me detyrë teknologe e ushqimit.
