Deputetja Rudina Hajdari renditi disa nga problemet që sipas saj pengojnë Shqipërinë që të ketë një proces zgjedhor demokratik. Gjatë konferencës së organizuar nga “KRIIK Albania”, Hajdari përmendi midis të tjerash kërcënimin e qytetarëve për votën apo blerjen e votës.
“Njerëz të armatosur, të cilet futen në qendra votimi e që jo rrallë kanë shkaktuar pothuajse në çdo zgjedhje edhe viktima; Njerëz të armatosur të cilët kercënojnë votuesit, qoftë duke u kontrolluar votën nepërmjet aparateve celularë, apo duke u marrë kartat e identitetit për tu pamundësuar votimin; Makina të cilat lëvizin natën dhe shërbejnë për të shpërndarë ose para cash, ose të mira materiale nepër shtëpitë e votuesve të varfër; Biznese të cilat kërcënohen me gjoba apo mbyllje nëse nuk i vendosin shërbimet në funksion të fushatës elektorale; Punonjës të administratës publike të cilët braktisin funksionet e tyre dhe nga mëngjesi në darkë i sheh të fushatojnë përkrah, ose për kandidatët e partisë ku militojnë; Militantë të veshur si komisionerë të cilët shqyejnë votat e atyre partive që nuk kanë komisionerë; E gjithë kjo ekspoze, përkthehet në mungesë të theksuar të demokracisë, dhe pavarësisht se kush vjen në pushtet, cili indidvid apo parti politike, rezultati është gjithnjë i njëjtë. Autokraci, korrupsion, keqadministrim, varfëri dhe mungesë zhvillimi ekonomik.”
Sipas Hajdarit, amendimet në Kodin Zgjedhor zhbënë kauzën për të hapur listat. Ajo shtoi se edhe Parlamenti i ardhshëm do të jetë i mbushur me njerëz që i shërbejnë kryetarit. Por nënvizoi se ka ende shpresë që gjërat të përmirësohen dhe tregoi si mund të arrihet kjo.
“Unë nuk jam pesimiste, jam thjesht realiste. Më pëlqen ta shoh dhe ta flas realitetin ashtu siç është. Në fund të tunelit tonë ka dritë, dhe kjo konferencë është një nga ato rrezet e dritës të cilat depërtojnë. Na duhet të flasim më shumë, të bërtasim më shumë në fakt, për të gjitha mangësitë që ka sistemi ynë zgjedhor. Na duhet të bashkohemi dhe organizohemi më shumë, të gjithë ne që na intereson një sistem i drejtë, të bashkëpunojmë më shumë e më mirë me partnerët tanë si SHBA apo BE, të mobilizojmë më shumë e më mirë qytetarët që ta kuptojnë se sa e rëndësishme është për ta dhe të ardhmen e fëmijeve një sistem i drejtë zgjedhor.”
