FOTO LAJM/ PREKËSE, nënë e bir bashkohen pas 8 ditësh, merr fund aventura e gjyshërve me Amarit 3-vjeçar

Ka marrë fund aventura e dy gjyshërve Rexhep dhe Bahrie Gjuni në Durrës pasi morën dhe fshehen për 8 ditë nipin e tyre.

3-vjeçari është dorëzuar fillimisht në polici nga gjyshja gjatë ditës së sotme, e cila më pas ka njoftuar të ëmen tij Ile Gjuni duke ia dorëzuar.

Ndërkohë, pritet të vendoset se çfarë do të ndodhë me gjyshen e fëmijës, teksa gjyshi është në burg prej disa ditësh.

Fëmija ishte zhdukur prej tetë ditësh pasi gjyshërit nuk ia dorëzuan atë të ëmës siç kishin rënë dakord më herët për vizitat e tij në shtëpinë e babait të ndjerë.

Një vit më parë, familja kishte humbur djalin 35-vjeçar dhe fill pas aksidentit tragjik, Ile Gjuni mori fëmijën e lindur nga kjo martesë dhe shkoi në shtëpinë e prindërve të saj.

Ndërkohë, gjatë kësaj kohe ajo ia dërgonte djalin gjyshërve për ta takuar, por në njërin prej këtyre takimeve ata nuk e kanë dorëzuar fëmijën duke pretenduar se ai duhej të rrinte me ta.

Njoftimi i policisë

Komisariati i Policisë Durrës ka vijuar punën kërkimore dhe hetimore, për gjetjen e 3-vjeçarit dhe për dokumentimin e plotë të kësaj ngjarjeje, për të cilën deri tani janë arrestuar shtetasit R. Gj. (gjyshi) dhe A. S. (vëllai i gjyshes), të dyshuar si bashkëpuntorë për rrëmbimin e 3-vjeçarit.

Në këtë kuadër janë kryer një tërësi veprimesh hetimore dhe kontrolle të shumta në Durrës, Has, Kukës dhe Tiranë.

Si rezultat i presionit policor, kërkimeve të shumta dhe negociatave, sot është vetëdorëzuar shtetasja B. Gj., së bashku me nipin e saj 3-vjeçar, të cilin e mori nëna e tij, në gjendje të mirë shëndetësore.

Në drejtimin e Prokurorisë pranë Gjykatës së Shkallës Parë të Juridiksionit të Përgjithshëm Durrës, vijon puna hetimore për sqarimin e plotë të rrethanave dhe dokumentimin e plotë ligjor të rastit. /vizionplus.tv