Gjatë kontrollit në afërsi të vendit ku u dogj motori, hetuesit kanë gjetur edhe armën e zjarrit të vrasjes së Bujar Nasufit.
Gazetari i Vizion Plus Esido Barkaj, bën me dije se arma është automatik i shkurtër. Autori ka djegur dhe armën e zjarrit. Arma është dërguar gjithashtu në laborator për ekspertizë.
Motori i djegur u gjet në zonën e “Kodrës së Diellit” në Tiranë.
Njoftimi:
Në lidhje më ngjarjen e ndodhur mbrëmjen e djeshme ku u vra me armë zjarri shtetasi B.N, ju informojmë se: Në vendin e quajtur “Kodrat e Sharrës” gjatë krehjes së zonës, shërbimet e Policisë kanë gjetur një motomjet të djegur, i cili dyshohet se i përket autorit.
Vijon puna nën drejtimin e Prokurorisë, për dokumentimin ligjor të ngjarjes, si dhe po kryhen të gjitha veprimet hetimore përkatëse me qëllim identifikimin dhe kapjen e autorit/ve.
Grupi hetimor po kryen veprime intensive për sekuestrimin e çdo prove që do ti shërbejë hetimit për zbardhjen dhe dokumentimin ligjor, identifikimin dhe kapjen e autorëve.
Bujar Nasufi, 56 vjeç u ekzekutua me armë zjarri mbrëmjen e djeshme, 12 janar, sapo iu afrua banesës së tij në rrugën “Myrte Zeneli” te “Pallati me Shigjeta” në Tiranë.
Më herët burime pranë grupit hetimor bëjnë me dije se konfliktet brenda rrethit familjar janë pista kryesore ku po hetohet.
Dyshimet janë se viktima Bujar Nasufi ka pasur konflikte për pronat me anëtarë të tjerë të fisit.
Hetuesit kanë arritur që të sekuestrojnë disa kamera sigurie ku duket autori i krimit, i cili është me kapuç. Gazetari i Vizion Plus, Esido Barkaj mëson se autori ishte maskuar si shpërndarës picash. Ai ka qenë duke e pritur viktimën në afërsi të banesës.
Nasufi u ekzekutua në sy të bashkëshortes së tij. Kjo e fundit ishte brenda mjetit në momentin kur autori afrohet dhe e qëllon duke e lënë të vdekur në vend. Në vendngjarje janë gjetur 6 gëzhoja, ndërsa 2 plumba kanë rezultuar fatalë për 56-vjeçarin.
Dinamika e ngjarjes
Kanë qenë dy automjete, një e viktimës dhe tjetra e vëllait të tij që kanë qenë duke u afruar në banesë. Të dyja familjet jetojnë në një godinë, pallat që e kanë ndërtuar para disa vitesh.
Fillimisht në rrugicë është futur mjeti i të vëllait, ndërsa pas ka qenë mjeti i viktimës.
Sapo ky i fundit ka dashur të parkojë në rrugë, autori është afruar dhe e ka qëlluar dhe më pas është larguar me motor drejt zonës së Selitës./vizionplus.tv/
