Deputeti dhe njëkohësisht ish-anëtari i KPK, Olsi Komici, tha në studion e QUO VADIS në Vizion Plus se situata aktuale e Belinda Ballukut nuk justifikon një masë më të ashpër sigurie.
Ai theksoi se Balluku është larguar si nga detyra e zv.kryeministres, ashtu edhe nga posti i ministres, duke mos pasur më akses institucional.
Sipas tij, në momentin kur komunikohet akuza, dosja konsiderohet e plotësuar pothuajse tërësisht dhe nuk ka elementë që mund të cenojnë provat.
Komici ngriti pikëpyetje nga studio e QUO VADIS mbi arsyen pse kërkohet një masë më ekstreme në një kohë kur akuza mbetet e njëjtë.
Pjesë nga biseda:
Komici: Cilat janë arsyet që SPAK kërkon rëndim të masës së sigurisë? Balluku ka ikur qoftë nga detyra e zv.kryeministres, qoftë si ministre. Pra, në këto momente znj. Balluku nuk ka asnjë akses. Në momentin që komunikohet një akuzë, është kopsitur dosja. Kur jepet akuza, dosja është e plotësuar pothuajse, mos të them 100%. Nuk ka elementë që mund të prishen si prova.
Borakaj: Nëse Parlamenti lejon heqjen e imunitetit, SPAK mund të bëjë edhe kontrolle të banesës apo telefonit të znj. Ballukut.
Komici: SPAK nuk e ka të ndaluar të hetojë. Prokuroria ka paraqitur provat. SPAK ka akses të plotë kudo, në çdo institucion, të marrë dëshmi, ka hapësirën e saj ligjore. Ajo që unë jam kurioz është që kërkohet një masë më ekstreme në një kohë kur akuza mbetet po ajo. Atëherë pse duhet të rëndohet kjo masë sigurie? A mund të arratiset znj. Balluku? Të gjitha dokumentacionet e hedhin poshtë.
/vizionplus.tv
