Demokratët u përfshinë sërish sot në debate të ashpra se kush është kryetar i grupit parlamentar të PD. Ishte Lulzim Basha i cili nga foltorja e kuvendit kërkoi nga kryetarja Lindita Nikolla ta njohë zyrtarisht si kryetar të grupit parlamentar, duke u përplasur ashpër me Gazment Bardhin, i cili aktualisht drejton grupin demokrat.
LULZIM BASHA
“Jepni fund kësaj maskaradë është detyra juaj të shpreheni pro kushtetutës, pro ligjit për partitë politike, pro kodit zgjedhor siç e keni për detyrë. Ose nëse keni vendosur kulisat tuaja të errëta të aleancave të kullave e non gratave, dilni e thojuni se jeni pjesë e aleancave”
GAZMENT BARDHI
“Të jem i sinqertë u emocionova shumë, nga aleanca e kullave, parafolësi është i vetmi që ka marrë dy kate në një kullë në një nga zonat më të shtrenjta të Tiranës dhe kur vjen këtu për aleanca kullash numëro katet e kullave të tuaja në kullën më të shtrenjtë të Tiranës tënden dhe familjarëve të tu.”
Ndërsa kuvendi ende nuk është shprehur se kush e drejton grupin E Partisë Demokratike, përplasja mes dy ish-bashkëpunëtorëve Basha e bardhi u zhvendos jashtë ambienteve të kuvendit.
LULZIM BASHA
“Është një shpifje e pastër e shkollës berishiste, vjen nga një njeri që dje sulmonte babin e zenit dhe sot është bërë avokati i babait të zenit dhe aleancës së kullave. Familjarët e mi çdo transaksion e kanë transparent ndryshe nga aleanca e kullave dhe avokati tyre i ri Gaz Bardhi”
GAZMENT BARDHI
“Basha një muaj pasi humbi zgjedhjet e i fut një porosi për dy kate. Është kulla në hyrje të Liqenit.”
Seanca e sotme u shoqërua me një incident mes demokratit Flamur Noka dhe medias. Noka në një moment tensioni qëlloi me rregulloren e kuvendit drejt operatorit të Vizion Plus, pasi mendoi se ai po xhironte telefonin e ish-kryeministrit Berisha.
Më pas vetë deputeti Noka kërkoi ndjesë për incidentin dhe sjelljen ndaj medias.