Përfaqësuesit e Opozitës në Këshillin Politik, Oerd Bylykbashi dhe Petrit Vasili i kanë dërguar një letër Damian Gjiknurit dhe Rudina Hajdarit, në të cilen kërkohet mbledhja e komisionit edhe të dielën, me qëllim që të nisë sa më shpejt reforma zgjedhore.
Në letër bëhet me dije se debati i hapur nga ana e përfaqësuesve parlametarë për pjesëmarrjen apo jo të opozitës në Këshill, nuk ka asnjë bazë të vërtete.
“Opozita ka qenë dhe mbetet e angazhuar për përmbushjen e këtij kushti për hapjen e negociatave me BE dhe për t’i siguruar qytetarëve shqiptarë mundësinë për zgjedhje të lira dhe të ndershme. Ky ka qenë angazhimi ynë i përditshëm, duke i vlerësuar zgjedhjet e lira dhe të ndershme si themelin e demokracisë, dhe procesin e integrimit europian si prioritet kombëtar. Nga momenti i ndërprerjes së mbledhjeve për shkak të pandemisë, nuk ka patur asnjë kërkesë apo ftesë për rinisjen e punës nga ana juaj. Deklaratat nga ana juaj për një reformë jokonsensuale dhe të njëanshme synojnë krijimin e ngërçeve politike artificiale që dëmtojnë konsensualitetin e Reformës Zgjedhore dhe janë shpenzim energjish i kotë në dëm të përmbushjes së një prej kushteve të vendosura nga BE për hapjen e negociatave për antarësim.”
Edhe pse shprehet që bllokimi i punës për Reformën Zgjedhore është një sjellje e hershme e qeverisë, opozita këmbëngul për bashkëpunim të vërtetë mes palëve për çështjet e reformës që sigurojnë zgjedhje të lira e të ndershme.
“Pavarësisht mungesës së përgjigjes nga ana juaj për propozimet tona, ne mbetemi të angazhuar, jo për fjalë apo debate pa vlerë, por për përmbylljen sa më parë të Reformës Zgjedhore, duke siguruar implementimin e Rekomandimeve të OSBE/ODIHR për standardet demokratike të zgjedhjeve”.
Rendi i ditës për mbledhjen e kërkuar nga opozita të dielën ose të hënën përmban 3 pika:
1.Riskedulimin e kalendarit të punës së Këshillit Politik, duke synuar përmbylljen e punës brenda datës 31 Maj 2020.
2.Vlerësimin e përfaqësuesve të maxhorancës mbi propozimet e deritanishme të opozitës të bëra në mbledhjet paraardhëse të Këshillit Politik.
3.Çështje të tjera të propozuara nga anëtarët e tjerë të Këshillit Politik.
