Kryeministrja daneze Mette Frederiksen ka njoftuar mbajtjen e zgjedhjeve të parakohshme parlamentare më 24 mars, disa muaj përpara afatit të rregullt, në një klimë politike të tensionuar pas përplasjes me SHBA-në për çështjen e Groenlandës.
Votuesit do të zgjedhin 179 deputetët e parlamentit danez, Folketing. Prej tyre, 175 vende u përkasin zonave zgjedhore në Danimarkë, ndërsa katër mandate ndahen mes përfaqësuesve të Groenlandës dhe Ishujve Faroe, territore autonome të Mbretërisë së Danimarkës.
“Nga ju varet drejtimi që do të marrë Danimarka në katër vitet e ardhshme”, deklaroi Frederiksen para deputetëve gjatë shpalljes së zgjedhjeve.
Sipas ligjit, zgjedhjet duhet të mbahen të paktën çdo katër vjet, por kryeministri ka të drejtë t’i shpallë ato në çdo moment. Zgjedhjet e fundit u zhvilluan në nëntor 2022 dhe prodhuan një koalicion trepartiak që bashkoi forca nga e majta dhe e djathta.
Frederiksen, në pushtet që nga viti 2019, aktualisht drejton një qeveri koalicioni me Partinë Liberale, të udhëhequr nga ministri i Mbrojtjes Troels Lund Poulsen, dhe Partinë e Moderuar të qendrës, të drejtuar nga ministri i Jashtëm Lars Løkke Rasmussen.
