Kreu i “Foltores”, Sali Berisha, prezantoi këtë të hënë kandidatin e koalicionit “Bashkë Fitojmë” për Bashkinë e Gramshit, Hasim Çekrezin.
Gjatë fjalës së tij, Berisha përsëriti kërkesën e tij ndaj kundërshtarit duke e ftuar në një debat televiziv. Ai deklaroi se ndonëse është i gatshëm për t’i thënë të vërtetat në sy, pala tjetër ka frikë nga debati për shkak të përfshirjes në afera korruptive.
Mblelljen e pemëve me të cilën krenohet Partia Socialiste, Berisha e konsideroi si jo reale dhe si një tjetër vjedhje e parave publike nga qeveria.
“Çfarë po ndodh tani? E keni vënë re ju, ka kapur lopatën tani dhe kalojnë nga rrethi në rreth me lopatë në dorë se gjoja po mbjellin pemë. Prisni, me dheun e asaj lopate ai në radhë të parë do të ju hedhë hi syve qytetarëve, se nuk është i zoti të ballafaqohet në asnjë rast me asnjë kandidat tonë në asnjë bashki.
Sille atë, sille këtu. Të ju pyes një gjë. A duhet që të përballemi në televizor njëri me tjetrin dhe të ua themi të vërtetat njëri-tjetrit para jush. Këta se pranojnë, nuk ka kandidat të tyre. Këta janë si hije, nuk dalin në asnjë ekran televiziv. Dhe pastaj merr lopatën dhe mendon se do të ju mashtrojë me lopatën. Merr lopatën dhe do të mbjellë gjithsej, 3600 pemë.
Po ku e kanë hallin, e kanë hallin tek pylli 1 milion, që bashkë me Erion Veliajn pretendojnë se kanë mbjellë 1 mln pemë në Tiranë. Por të ju them të vërtetën. Kur bëra llogaritë dhe e shihja se ishte e turpshme, një mashtrim banal i papërgjegjshëm, ato 1 milion pemë, duan të paktën 6-9 mijë hektarë. Kurse parku i liqenit ka 32 mijë pemë.
Vetëkuptohet se në 1 milionë pemë kanë vjedhur paratë për 990 mijë fidanë. Po si kanë vjedhur, kanë vjedhur me një pishtë, 10 fishin e çmimit. Kanë blerë pishën 5600 euro. Po, me fatura. Atëherë ky meqë ka dalë gjithë ky skandal, merr lopatën dhe kujton se po mashtron”, tha ai.
Shoqëruar dhe nga aleati i tij, Ilir Meta, ish kreu i demokratëve kërkoi votëbesimin e qytetarëve duke theksuar se ai ofron alternativën më të mirë për vendin.
