Kreu i grupit parlamentar të Partisë Demokratike, Gazment Bardhi, ka kërkuar që kryeministri Edi Rama të jetë i pranishëm në Kuvend për të dhënë llogari lidhur me çështjet e ngritura nga opozita dhe zhvillimet në vend, përfshirë edhe debatin mbi raportin e integrimit.
Bardhi u shpreh se kryeministri duhet të raportojë drejtpërdrejt në seancë plenare, duke e akuzuar atë se ka mbajtur qëndrime të ndryshme brenda një periudhe të shkurtër dhe se shmang përgjegjësinë parlamentare.
Sipas tij, prania e kreut të qeverisë në Kuvend ka qenë e kufizuar, ndërsa e ka cilësuar mënyrën e raportimit të ekzekutivit si të pamjaftueshme dhe jo transparente.
Ai theksoi se “përgjegjësia nuk jepet me korrespondencë” dhe kërkoi që kryeministri, së bashku me përfaqësues të qeverisë, të raportojnë në mënyrë të drejtpërdrejtë përpara deputetëve.
“Brenda një muaji ka dhënë 7 qëndrime të ndryshme, ndaj zoti kryetar duhet të vijë këtu të japë llogari. Duhet të ishte kryeministri në Kuvend që të raportonte për raportin. Ne kemi dhe një ministër në këtë vend, që duhet të japë llogari. Është kryeministër karton. Ka ardhur vetëm kur do votonte për Belinda Ballukun. Erdhi dhe kur i duheshin Taulantit votat për shtetësinë. Përgjegjësia nuk jepet me korrespondencë. Ne nuk kemi prezent kryeministrin në seancë. Nuk ndodh në asnjë vend të botës që kryeministri të vijë në Kuvend! Që nga nisja e seancave ka ardhur vetëm 2 herë. Duhet ta thërrisni dhe të vijë të japë llogari, bashkë me Kryenegociatoren. Si ka mundësi vjen në Komision por nuk vjen në seancë ministrja e Shtetit vetë për këtë çështje”, tha Bardhi.
