Kryeministri Edi Rama shpërtheu në akuza kundër Partisë Demokratike këtë të martë. Nëpërmjet një postimi në “Twitter”, Rama reagoi për akuzat e hedhura nga demokratët për maskat. Sipas kryeministrit, kjo është metodë e PD për të ardhur në pushtet me shpifje.
“Ka vetëm një palë maska të dëmshme në Shqipëri: Maskat e atyre që dhe kur ky vend lufton me jetën nën gërmadhat e tërmetit apo me një virus kërcënues për planetin, s’ndalen së kërkuari pushtet me shpifje, sherr, rrëmujë! Po përsëri Shqipëria do t’ia dalë sepse shqiptarët s’janë vetëm!”
Më herët Basha përmes një daljeje publike nga selia e PD kishte akuzuar qeverinë se nuk kishte marrë masat e duhura në kohën e duhur për sëmundjen e koronavirusit.
Duke i konsideruar spitalet të papërgatitura për të përballuar fluksin, Basha bënte thirrje për të akorduar me urgjencë një fond të posaçëm për pajisjen e stafeve mjekësore me mjetet e duhura. Kjo pasi sipas liderit të PD, një pjesë e mirë e maskave që përdorin mjekët në spitalet publike kishin skaduar që në vitin 2011.
