Sonila Muskaj, eksperte për integrimin, gjatë një interviste për emisionin “E-ZONE” në Vizion Plus tregon dy arsye pse Komisioni Europian ka shtuar vëmendjen për të financuar projekte infrastrukturore, veçanërisht në hekurudha, në Shqipëri dhe në rajon.
“Sektori hekurudhor po merr vëmendje të madhe për periudhën nga 2024-2029 nga komisioni. Prioritet e komisionit janë për një fuqizim të sektorit për të realizuar një rrjet të qëndrueshëm dhe të ndërlidhur transporti. Çdo korridor prioritar, si ai Vorë-Hani i Hotit, duhet të ketë lidhje me rrugë dhe hekurudhë. Një pikë radikale e fokusit të komisionit është në kuadrin e trazicionit energjetik dhe ekonomisë së gjelbër”, – tha Muskaj.
Ajo që është evidente është fakti se të gjitha këto projekte kanë vonesa në realizimin e tyre, duke tejkaluar afatet e përcaktuara disa herë.
“Të gjitha projektet e infrastrukturës kanë vonesa. Kjo ndodh jo për faj të vendeve përfituese, por procedurat kanë vonesa nga koha e programimit deri në zbatim. Kjo është për shkak të procedurave dhe rregullave të BE-së. Kjo gjë është evidentuar si një e metë nga organizatat dhe nga qeveria, e cila është e ndërgjegjësuar për këto lloj vonesash, të cilat janë përcjellë pranë komisionit si shqetësime që të reflektohet në të ardhmen“, – Sonila Muskaj, eksperte për integrimin gjatë një interviste për emisionin “E-ZONE” në Vizion Plus.
Komisioni evropian ka përfshirë Shqipërinë në rrjetin europian të transportit të quajtur “TEN-T”, çka do të thotë se të gjithë fondet që do të japë BE do të jenë në formë granti për zhvillimin e projekteve infrastrukturore. Realizimi i projekteve të tilla, ofrimi i shërbimeve me standard për qytetarët është integrimi i vërtetë në Bashkimin Europian.
