“Gjermania po paguan çmimin e frenimit të borxhit”, deklaroi në një intervistë për disa media evropiane, përfshirë gazetën Handelsblatt, kryeekonomisti i Fondit Monetar Ndërkombëtar, Pierre – Olivier Gourinchas, duke iu referuar ecurisë së pafavorshme të ekonomisë gjermane dhe duke mbështetur nevojën për reforma që do t’i jepte Berlinit hapësirë për manovra fiskale.
“Gjermania po paguan çmimin e një frenimi shumë të fortë borxhi. Zgjidhja më e mirë do të ishte lehtësimi i këtij rregulli”, deklaroi ekonomisti francez. “Nevojat strukturore të Gjermanisë për shpenzime po rriten, pavarësisht nëse ka të bëjë me mbrojtjen e klimës, politikën e mbrojtjes apo pavarësinë energjetike,” shpjegoi ai.
Megjithatë, ai theksoi se Gjermania është në një situatë të ndryshme nga disa prej partnerëve të saj evropianë.
“Borxhi gjerman është nën kontroll absolute”, tha ai.
Frenimi i borxhit, i shtuar në 2009 në tekstet kushtetuese gjermane, e ndalon qeverinë të marrë hua më shumë se 0.35% të PBB-së së saj në vit për të kufizuar sasinë e borxhit publik. Por Gjermanisë i duhen miliarda euro investime për të zbatuar tranzicionin klimatik dhe për të riparuar industrinë e saj, e cila është goditur nga rritja e çmimeve të energjisë dhe konkurrenca amerikane dhe kineze.
“Nëse nuk bëhen investime tani , vendi rrezikon de-industrializimin dhe humbjen masive të prosperitetit në të ardhmen,” paralajmëron ekonomisti gjerman Sebastian Dullien, president i institutit IMK në Berlin.
Ekonomia e Gjermanisë ishte një nga performuesit më të dobët në eurozonë, duke u tkurrur me 0.3% në vitin 2023, e rënduar nga një ngadalësim në industri. Situata u përkeqësua në nëntor me vendimin e Gjykatës Kushtetuese të Karlsruhes, e cila hodhi poshtë, në emër të frenimit të borxhit, përdorimin e kredive investuese në vlerën 60 miliardë euro./vizionplus.tv/
