Kreu i Partisë Republikane, Fatmir Mediu, ka zhvilluar një takim elektoral me banorët e Kamzës, në mbështetje të kandidatin të opozitës për këtë zonë.
Gjatë fjalës së tij, Mediu iu bëri thirrje qytetarëve që më 14 maj të bëjnë zgjedhjen e duhur, pasi ky do të jetë një moment vendimtar për të ardhmen e tyre dhe fëmijëve të tyre.
“Kjo është ora juaj, është ora e shqiptarëve, të cilët nuk pranojnë poshtërimin dhe përbuzjen, është ora jonë për t`u ngritur dhe për të luftuar të gjithë së bashku, për atë që kemi më të shenjtë, fëmijët tanë, prindërit tanë, familjen tonë, Shqipërinë.
Është momenti që të tregojmë që ne nuk mundet të shikohemi si njerëz të dorës së dytë. Prandaj kam bindjen që Arjani në krye të Bashkisë, nuk do të jetë sic e quajmë ne “qytetari i parë”, por do të jetë shërbëtori i parë i Kamzës, për t`i shërbyer nevojave dhe interesave tuaja”, thekson ai.
Mediu nënvizoi se kundërshtari duhet larguar menjëherë nga qeverisja vendore, pasi në të kundërt qytetarët do të përballen me një kalvar vuajtjesh.
“Ne nuk jemi pronarë të pushtetit, ne nuk jemi pronarë të jetës suaj, ne nuk jemi pronarë të taksave tuaja. Ju na keni zgjedhur për t`ju përfaqësuar ju, për t`i përdorur këto taksa ne shërbim të zhvillimit tonë ekonomik, në shërbim të familjeve tuaja, dhe një njeri i cili sillet me taksat tuaja, me pushtetin dhe me ligjin sikur të jetë pronar, duhet të largohet sa më parë, përndryshe do të jetë një kalvar i rëndë, në kurrizin tonë, në pamundësinë tonë për të ndërtuar jetën dhe lumturinë në Shqipëri”, shton ai.
Koalicioni “Bashkë Fitojmë” në këto zgjedhje për Bashkinë Kamzë përfaqësohet nga Arjan Hoxha.
