Analisti Mentor Kikia, i ftuar këtë të enjte në “Quo Vadis” në Vizion Plus, ka analizuar kërkesën e mazhorancës për ndryshime kushtetuese, të cilat prekin edhe sistemin e drejtësisë.
Kikia tha se shpreson që ndërkombëtarët të mos lejojnë që drejtësia të preket drejtpërdrejt.
Sa i përket deklaratave politike, Kikia u shpreh se kjo është një situatë komike, kur sheh sot Berishën që mbron SPAK dhe Ramën që e sulmon, ndërkohë që pak kohë më parë ndodhte e kundërta.
“Të dëgjosh Berishën që mbron SPAK është komike, duke pasur parasysh sulmet që kishte ndaj ish-drejtuesit; e ktheu në një lloj kauze. Megjithatë, përtej pjesës komike, pasi politika shqiptare është e tillë deri dje Berisha e sulmonte dhe Rama e mbronte SPAK-un, ndërsa tani rolet janë ndërruar pjesa serioze është se mazhoranca socialiste ka filluar të ‘gatuajë’ disa gjëra të rrezikshme për SPAK-un.
Kujtojmë që Xhafaj, para zgjedhjeve, nisi të mblidhte problematikat që ka SPAK-u me idenë që t’i zgjidhte. Pra, politika filloi të interesohej, por duhet të ishte e kundërta: vetë sistemi duhet të reflektonte barrierat dhe t’i kërkonte ndihmë Kuvendit. Nuk ndodhi kjo, por ndodhi e kundërta vetë ‘mjeku’ donte të vizitonte ‘pacientin’ që nuk ankohej.
Filloi kjo historia e inspektimit, shkuan deputetët në prokurori dhe iniciativat për të vendosur barriera ligjore. Unë mendoj që, përtej retorikës politike, nëse kjo agjendë shkon përpara, ka një element tërheqjeje. Unë mendoj se ajo historia e thyerjes së parë mes ekzekutivit dhe drejtësisë nuk lidhet me atë që thuhet, por me atë që shkruhet. Shpresoj që ky lloj presioni të pengojë ligjvënësin që të shkojë më tutje”, tha Kikia.
