Në kushtet ku sektori i blegtorisë po shënon rënie dyshifrore nga viti në vit, tregu po orientohet drejt ushqimeve që prodhohen me produkte jonatyrale. Denoncimi vjen nga kreu i Këshillit të Agrobiznesit, Agim Rrapaj në emisionin E-ZONË. Sipas tij, importi i këtyre produkteve po shënon rritje, por problem qendorn në faktin se vendi ynë nuk ka laboratorë të specializuar për të evidentuar cilësinë e lëndës së parë.
“Ne po importojmë sasi të mëdha produktesh analoge, si djathë, gjizë, salcë etj., që nuk prodhohen nga qumështi, po nga enzima të tjera dhe nënprodukte të tjera jonatyrale, të cilat po zëvendësojnë produktet blegtorale që mungojnë në treg. Këto produkte janë të lejueshme të tregtohen, por ka një rrezik. Laboratorët tanë nuk evidentojnë dot elementet përbërës të tyre, që s’janë të shëndetshme për njeriun në një kohë afatagjatë”, tha Rrapaj.
Është kjo arsyeja pse në treg shiten produkte bulmeti me çmime të cilat nuk reflektojnë koston reale.
“Është e pamundur që një kg djath i përbërë me produkte natyrale të ketë një kosto prej 400-500 lekë. Çmime të tilla që nuk i afrohen kostos reale përfaqësojën produkte jo me qumësht natyral.”
Këshilli i Agrobiznesit do të kërkojë mbledhjen e bordit të ushqimit, një strukturë e cila ka disa vite që nuk mblidhet për të ofruar më shumë garanci për cilësinë e lëndëve të para që duhet të përdoren për ushqimet që kosumojmë.
