Presidenti i Republikës, Ilir Meta deklaroi se marrëdhëniet mes Shqipërisë dhe Izraelit duhet të jenë të ngushta me qëllim që të lufta kundër terrorizmit dhe ekstremizmit të dhunshëm të jetë sa më e efektshme.
Deklaratën ai e bëri gjatë një interviste të dhënë për gazetarin Larry Luxner për “The Times of Israel”, gjatë vizitës zyrtare atje. Duke folur për mbijetesën e hebrenjve të Shqipërisë gjatë pushtimit nazist, Meta tha se kjo gjë ndodhi falë myslimanëve dhe të krishterëve vendas.
“Ishte detyrimi ynë për ta bërë këtë. Por ne shpresojmë që kjo lidhje e madhe midis kombeve tona do të rezultojë në një marrëdhënie më produktive për të ardhmen. Ne mund të mësojmë shumë nga Izraeli dhe gjithashtu të jemi partnerë shumë efektivë, veçanërisht në çështjet e sigurisë, sepse përballemi me kërcënime si terrorizmi dhe ekstremizmi i dhunshëm.”
Kreu i shtetit u ndal edhe tek viktimat e Holokaustit, për të cilët tha se ata nuk do të harrohen kurrë.
“Unë jam këtu sepse nuk duhet të harrojmë kurrë. Mënyra më e mirë për ta bërë këtë është të tregojmë solidaritetin tonë me ata që vuajtën kaq shumë dhe humbën jetën gjatë Holokaustit. Ne gjithashtu duam të nderojmë të mbijetuarit që dëshmuan këtë gjenocid, dhe t’i dërgojmë një mesazh të qartë kujtdo që promovon përjashtimin, urrejtjen dhe dhunën se antisemitizmi nuk ka vend në shoqëritë tona.”
Ai u ngacmua nga gazetari izraelit edhe për marrëdhënies Kosovë-Izrael. Meta pranoi se dëshira e Shqipërisë është që Izraeli të njohë Kosovën si shtet.
“Kosova dhe Izraeli kanë një miqësi të madhe. Ne dëshirojmë dhe shpresojmë që Izraeli ta njohë pavarësinë e Kosovës sa më shpejt të jetë e mundur. Unë nuk mund të flas në emër të secilit vend, por ka simpati të madhe midis kosovarëve për hebrenjtë, dhe anasjelltas. Shpresoj se do të vijë koha. Deri atëherë, të gjitha mundësitë për bashkëpunim dhe zhvillim dypalësh duhet të shfrytëzohen.”
