Të paktën 8 persona kanë humbur jetën dhe 36 të tjerë janë plagosur si pasojë e një zjarri të madh që shpërtheu në një qendër tregtare pranë kryeqytetit të Iran, Teheran.
Zjarri ra të martën në qendrën tregtare Argkavan Mall, në qytetin Andisheh. Deri tani nuk dihen shkaqet e shpërthimit të flakëve, ndërsa televizioni shtetëror IRIB njofton se autoritetet kanë nisur hetimet për ngjarjen.
Pamjet e publikuara nga mediat iraniane tregojnë zjarrfikësit duke luftuar me flakët, ndërsa re të dendura tymi të zi ngriheshin nga ndërtesa shumëkatëshe.
Sipas informacioneve paraprake, deri më tani nuk ka asnjë tregues që zjarri lidhet me konfliktet apo luftën në rajon.
