Shtatë ministra nga partia më e madhe e Rumanisë, Socialdemokratët (PSD), dhanë sot dorëheqjen nga qeveria e koalicionit pro-evropian të kryeministrit Ilie Bolojan, duke e lënë atë pa shumicë parlamentare dhe duke vënë në rrezik aksesin në fondet e Bashkimit Evropian.
Socialdemokratët (PSD), mbështetës të të cilëve janë orientuar drejt opozitës së ekstremit të djathtë, i kërkuan të hënën liberalit Bolojan të japë dorëheqjen, duke kritikuar përpjekjet e tij për të ulur shpenzimet publike me qëllim reduktimin e deficitit më të madh buxhetor në Bashkimin Evropian, megjithëse deri më sot kishin miratuar të gjitha masat e qeverisë.
Perspektiva e një kolapsi të koalicionit katërpartiak, i formuar vetëm dhjetë muaj më parë, kërcënon vlerësimin e kreditit të Rumanisë, i cili ndodhet në pragun më të ulët të nivelit të investimeve. Kjo situatë mund të çojë në përkeqësim të mëtejshëm të deficitit dhe në rritje të kostos së huamarrjes, si dhe vë në rrezik rreth 27 miliardë euro në grante dhe kredi nga BE-ja.
Bolojan, i cili refuzoi të japë dorëheqjen, ka deklaruar se do të emërojë zëvendësues të përkohshëm nga anëtarët e tjerë të kabinetit për një periudhë 45-ditore, derisa një qeveri e re të miratohet nga Parlamenti.
Socialdemokratët planifikojnë të paraqesin një mocion mosbesimi ndaj Bolojan në ditët në vijim dhe mund të rrëzojnë qeverinë me mbështetjen e opozitës së ekstremit të djathtë, Aleanca për Bashkimin e Rumunëve (AUR), partia e dytë më e madhe në parlament, e cila aktualisht kryeson në të gjitha sondazhet.
Zyrtarë të partisë deklaruan se zëvendësministrat e PSD-së në qeveri do të japin dorëheqjen sapo të depozitohet mocioni i mosbesimit.
“PSD është gati të formojë një qeveri të re pro-evropiane dhe të mbështesë një kryeministër, politik ose teknokrat, i cili do të jetë i ndjeshëm ndaj problemeve të qytetarëve dhe i aftë të bashkëpunojë me partitë për të siguruar një shumicë parlamentare”, thuhet në një deklaratë të partisë.
Partia Liberale e Bolojan përjashtoi të martën mundësinë e një koalicioni të ri me të majtën, pa të cilën nuk mund të arrihet një shumicë parlamentare pro-evropiane.
Në bisedimet me presidentin qendrist të Rumanisë, Nicușor Dan, të mërkurën, katër partitë e koalicionit përjashtuan mundësinë e bashkëpunimit me ekstremin e djathtë, por theksuan se nuk kanë rënë dakord në asnjë formë për të vazhduar qeverisjen së bashku.
Koalicioni aktual u formua dhjetë muaj më parë me synimin për të frenuar rritjen e partive të ekstremit të djathtë, por partitë janë përplasur vazhdimisht për çështje që lidhen me shkurtime buxhetore.
