“23 maji është një shans historik për PD”, kështu deklaroi këtë të enjte në studion e “Quo Vadis” të moderatores Pranvera Borakaj, gazetari Denis Minga, duke iu referuar zgjedhjeve për kreun e ri të selisë blu.
Minga tha se e ardhmja e PD për ndryshim është e gjitha në dorë të Sali Berishës. Sipas tij, nëse Berisha deklaron se largohet nga drejtimi i PD dhe i hap rrugën një gare të vërtetë, Flamur Noka dhe Gazment Bardhi nuk do të jenë më aty.
Pjesë nga biseda:
Borakaj: Mendon se është vetëm çështja Berisha apo e të gjithë strukturës?
Minga: Unë mendoj se është e Berishës. Është ai njeriu që ka potencialin për t’i dhënë ndryshime reformuese. Po të ketë vullnet, Berisha nuk e pengon dot Noka apo Bardhi.
Borakaj: Po nëse Berisha shkonte me një listë tjetër, do kishte këtë rezultat?
Minga: Ajo që ndodhi më 11 maj është ezauruar. Por po them se 23 maji është një tjetër shans për PD. E para, sepse PD ruajti dominimin si forca më e madhe e opozitës dhe e dyta, ka një konsum të qeverisë. Nëse Berisha i hap rrugë reformimit, në 3 vite formon një grup të ri.
Borakaj: Po kanë ardhur të rinj.
Minga: Po nuk është çështja aty, për sa kohë ke sërish Flamur Nokën. Nëse Berisha thotë “nuk jam më në PD”, nuk do e dëgjosh më zërin e Nokës në PD. Ai është njeriu me reputacionin më të ulët në PD.
