Në Gjykatën Administrative u mbajt këtë të premte seanca për padinë që kryebashkiaku i Tiranës Erion Veliaj ka ngritur ndaj prokurorit Ols Dado.
Seanca nuk u zhvillua dhe u shty për në datën 24 korrik, ora 09:00.
Shkak për shtyrjen e seancës u bë mungesa e avokatit të kryebashkiakut Plarent Ndreca.
Kujtojmë që seanca është shtyre edhe pak javë më parë për t’u dhënë kohë palëve të njihen me kërkesën e shoqatës “Asociacioni Kombëtar i Medias dhe Drejtësisë” që kërkon të përfshihet në gjykim. Shoqata kërkon që Administrativja të shpallë të pavlefshëm dekretin me të cilin Ols Dado u emërua prokuror në vitin 2008. Sipas përfaqësuesve të saj, çështja ka interes publik dhe lidhet me integritetin e sistemit të drejtësisë, një nga objektivat kryesore të veprimtarisë së kësaj shoqate.
Kryebashkiaku kërkon anulimin e dekretit të presidentit që e emëroi Dadon prokuror në 2008 pa shkollën e Magjistraturës. Palë e paditur, është edhe presidenca, institucioni që në atë kohë kur drejtohej nga Bamir Topi, dekretoi emërimin e Ols Dados prokuror.
