Një tragjedi e re ka ndodhur në autostradën e Rumanisë , e njëjta rrugë ku humbën jetën tifozët e PAOK-ut muajin e kaluar. Këtë herë, një aksident mori jetën e një familjeje të tërë kur një kamion hyri në trafikun përballë dhe u përplas me automjetin në të cilin udhëtonin një baba dhe dy fëmijët e tij.
Aksidenti fatal rrugor ndodhi të dielën, më 8 shkurt 2026, në Rumani, duke rezultuar në vdekjen e një babai 58-vjeçar dhe dy fëmijëve të tij, të moshës 13 dhe 16 vjeç. Sipas autoriteteve dhe mediave rumune, shoferi i kamionit kaloi në trafikun që vinte përballë, duke shkaktuar përplasjen fatale.
Ekipet e shpëtimit nxorën tre personat që ndodheshin në makinë, ndërsa shoferi i kamionit ofroi ndihmën e parë në vendngjarje dhe më pas u transportua në spital.
Autostrada, e njohur si Drumul Național 6 (DN6), është një nga akset rrugore më të rëndësishme të Rumanisë, që lidh Bukureshtin me rajonin perëndimor të Banatit dhe më gjerë me Hungarinë dhe Serbinë. Edhe pse është thelbësore për udhëtime dhe tregti, DN6 ka fituar reputacionin e “rrugës së vdekjes” në Rumani për shkak të frekuencës së lartë të aksidenteve të rënda rrugore.
Kjo tragjedi e re i shtohet listës së trishtueshme të aksidenteve në autostradën DN6, ku më 27 janar 2026, shtatë tifozë të PAOK-ut humbën jetën dhe tre të tjerë u plagosën rëndë kur furgoni që i transportonte ata u përplas me një kamion pranë Lugozit, në Qarkun Timiş./vizionplus.tv
