Presidenti i Ukrainës, Volodymyr Zelensky, është i gatshëm të negociojë drejtpërdrejt çështje shumë të ndjeshme me homologun e tij rus, Vladimir Putin, me synimin arritjen e një marrëveshjeje për përfundimin e luftës mes dy vendeve. Këtë e konfirmoi të martën ministri i Jashtëm i Ukrainës, Andriy Sybiha.
Në një intervistë për portalin ukrainas të lajmeve “European Pravda”, Sybiha theksoi se çështjet më delikate të procesit negociues ende nuk janë zgjidhur. Ai iu referua veçanërisht çështjes territoriale dhe fatit të centralit bërthamor të Zaporizhias, i cili ndodhet nën kontrollin e forcave ruse.
Sipas Sybiha-s, Zelensky është i gatshëm të takohet personalisht me Putinin për të zgjidhur çështjet e mbetura pezull.
Nga ana tjetër, Rusia kërkon që Ukraina të bëjë lëshime territoriale përpara se të pranojë një armëpushim, përfshirë tërheqjen e plotë të forcave ukrainase nga rajoni i Donbasit konkretisht nga Donetsku dhe Luhansku si dhe nga dy rajone të tjera që Moska pretendon se i ka aneksuar.
Centrali bërthamor i Zaporizhias, më i madhi në Evropë, u pushtua nga trupat ruse në mars të vitit 2022, disa javë pas fillimit të pushtimit rus të Ukrainës.
Zelensky ka kërkuar vazhdimisht një takim me Putinin edhe në të kaluarën, por Kremlini ka treguar zakonisht rezervë ndaj kësaj ideje.
Gjatë fundjavës, delegacione negociatore nga Kievi dhe Moska zhvilluan bisedime të drejtpërdrejta të parat pas disa muajsh në Emiratet e Bashkuara Arabe, me ndërmjetësimin e Shteteve të Bashkuara. Takimi i radhës pritet të mbahet të dielën, më 1 shkurt, në Abu Dhabi.
/vizionplus.tv
