Një moment sinqeriteti ka shoqëruar një bisedë mes Albano Bogdos dhe ish-futbollistit Nevil Dede në studion e QUO VADIS në Vizion Plus.
Dede, i ngacmuar edhe nga aktori, tregoi se gjatë kohës kur ishte futbollist, shpesh dëgjonte lojtarët më të mëdhenj të thoshin se futbolli atëherë ishte ndryshe. Ai kujtoi një bisedë me Ilir Dajën, sot trajner i Dinamos, të cilit i kishte bërë një pyetje të drejtpërdrejtë: A luhej futbolli më shpejt dikur apo sot?
Dede ndau një episod personal nga koha e pandemisë, kur djali e thirri për të parë një ndeshje të vjetër të Partizanit që po transmetohej në televizion. Teksa pa veten në fushë, ai u surprizua nga ritmi i lojës.
Pjesë nga biseda:
Bogdo: Festat frymëzojnë shumë sinqeritet në familje. Në kuadër të sinqeritetit, meqë sot është ditë feste, ditë Krishtlindjesh, thuaj të vërtetën: A u ke thënë ndonjëherë fëmijëve, duke parë ndeshjen e kombëtares, “Sikur të ishte babi aty sot, nuk do ta kishim pësuar atë gol”? Thuaje të vërtetën, trego frymën e sinqeritetit.
Dede: Kur isha futbollist, dëgjoja ata që ishin më të mëdhenj se ne të thonin: Ne bënim kështu atëherë, ne bënim ashtu. Pyeta Ilir Dajën, që tani është trajner i Dinamos, atëherë e kisha shok, jo trajner: O Ilir, si është futbolli? A luajmë më shpejt tani apo luhej më shpejt atëherë? Ai më tha: Çdo gjë evoluon. U fiksova pas idesë që gjenetikisht, nga viti në vit dhe nga brezi në brez, gjithçka zhvillohet dhe informacioni shtohet. Nuk dua të justifikoj veten, por dua të tregoj një ngjarje. Gjatë pandemisë, djali më thirri nga dhoma ndërsa unë isha në kuzhinë. Po transmetohej një ndeshje e vjetër e Partizanit. Pashë veten në fushë dhe m’u duk sikur po ecja. Me një km në orë. Më vinte turp, s’dija ca t’i thoja djalit.
/vizionplus.tv
