Banka e Shqipërisë i ka hapur rrugën hyrjes në treg të një banke tërësisht digjitale, e cila pritet të nisë punë brenda vitit të ardhshëm. Pra një bankë pa sportele, pa punonjës që të sqarojnë, por vetëm në mënyrë virtuale.
Por kush janë karakteristikat e një banke digjitale?
Viti 2025 po mbyllet me një numër bankash që arrin në 11. Ky numër ka ardhur në rënie për shkak të largimit të bankave me kapital grek disa vite më parë.
Por në 2026 parashikohet se ky numër të arrijë në 13, pasi përveç bankës digjitale do të hyjë në treg edhe një bankë me kapital turk.
“Është një vendim që vjen në kohën e duhur. Tashmë realiteti dikton se kryefjalë është digjitalizimi. Ndaj një bankë e tillë është e mirëpritur. Ajo do të funksionojë njësoj si një bankë tradicionale, vetëm se do të jetë online, pra virtuale”, -tha Elvin Meka ekspert bankarë në emisionin E-ZONE në Vizion Plus
Por në një shoqëri ku mungesa e njohurive financiare është e lartë, kush priten të jenë klientët e parë të një banke digjitale?
“Të parët do të jenë bizneset që operojnë në fushën e teknologjisë. E dyta mund të jetë vet qeveria që të përdorë shërbimet që do të ofrojë banka. Të tretët do të jenë grupmoshat e reja që janë më familjarë me teknologjinë”, -tha Meka
Por a është realiteti shqiptar gati për një bankë të tillë teksa siguria kibernetike mbetet boshti kryesor i një biznesi të tillë?
“Kjo do të mbetet sfida më e madhe e këtij biznesi. Investimet më të mëdha të kësaj banke do të jenë pikërisht për të ofruar sigurinë e duhur dhe për të mos rënë prej e sulmeve”, -përfundoi Meka
Të dhënat tregojnë se në vendin tonë çdo tre minuta ka një sulm kibernetik. Disa vite më parë Shqipëria u paraliza nga ofrimi i shërbimeve publike për shkak të një sulmi të paprecedentë, që bllokoi shërbimet online. Ndaj dhe digjitalizimi nuk mund të dhe nuk duhet të përjashtojë shërbimin fizik./vizionplus.tv
