Himara po përballet me një situatë të rënduar për shkak të zjarrit që prej mbrëmjes së kaluar ka përfshirë zonën dhe lagjen “1 Maji”. Flakët, të favorizuara nga era e fortë, janë përhapur me shpejtësi, duke shkaktuar dëme në banesa dhe sipërfaqe pyjore.
Deri më tani raportohet se të paktën gjashtë banesa janë shkrumbuar, ndërsa vijon operacioni për vënien nën kontroll të flakëve. Ndërhyrja po kryhet edhe nga ajri, pasi gjatë orëve të natës kushtet atmosferike e bënë të pamundur operacionin ajror.
Ministri i Turizmit, Blendi Gonxhja, ka reaguar për situatën, duke theksuar se rënia e erës ka ndihmuar në uljen e intensitetit të flakëve dhe ka mundësuar ndërhyrjen e forcave në terren.
“Prioritet jeta e njerëzve!”, ka theksuar Gonxhja, duke bërë të ditur se në operacion janë angazhuar zjarrfikës nga disa bashki, efektivë të Forcave të Armatosura, strukturat e Emergjencave Civile dhe ekipet e urgjencës mjekësore.
171 efektivë të Forcave të Armatosura në terren
Forcat e Armatosura kanë vijuar gjatë natës angazhimin në terren për menaxhimin e situatës së krijuar nga zjarri.
Sipas të dhënave të bëra publike, 171 efektivë, 10 mjete në terren, një mjet zjarrfikës dhe një ambulancë nga Forcat e Armatosura kanë qenë në gatishmëri dhe pranë komunitetit, në përballimin e situatës dhe mbrojtjen e jetës dhe pronës.
Autoritetet kanë shprehur mirënjohje për të gjithë efektivët dhe strukturat që janë angazhuar në operacionin për shuarjen e zjarrit dhe mbrojtjen e banorëve.
Në zonë vijojnë edhe operacionet e evakuimit dhe të lëvizjes së banorëve, të cilat po ndiqen nga Policia e Shtetit dhe shërbimet bashkiake.
Ndërkohë, Drejtoria Rajonale e Trashëgimisë Kulturore Vlorë po monitoron situatën pranë monumenteve të kulturës dhe zonave ku ndodhen objekte të trashëgimisë materiale.
Në ndihmë të operacionit janë bashkuar edhe banorë, biznese dhe vullnetarë të zonës, duke vënë në dispozicion mjete dhe pajisje pune.
Një grup hetimor ka nisur mbledhjen e të dhënave për të përcaktuar shkaqet e zjarrit dhe përgjegjësit e mundshëm.
Situata në Himarë vijon të mbetet e rënduar, ndërsa prioritet i autoriteteve mbetet mbrojtja e jetës së banorëve, e pronës dhe parandalimi i përhapjes së mëtejshme të flakëve.
/vizionplus.tv
