Një vatër zjarri është aktivizuar mesditën e kësaj të mërkure në zonën e Peshkëpisë, në bashkinë e Selenicës. Sipas informacioneve paraprake, flakët kanë shpërthyer fillimisht në një pyll me pisha dhe, të favorizuara nga temperaturat e larta dhe era, janë përhapur drejt një varreze makinash që ndodhet pranë.
Si pasojë e përhapjes së zjarrit, disa prej automjeteve të bllokuara në këtë hapësirë janë përfshirë nga flakët dhe janë djegur pjesërisht. Menjëherë pas marrjes së njoftimit, në vendngjarje ka mbërritur shërbimi zjarrfikës.
Aktualisht në terren ndodhet vetëm një automjet zjarrfikës me dy punonjës, të cilët po punojnë për izolimin e flakëve dhe shmangien e përhapjes së tyre në sipërfaqe të tjera. Ende nuk raportohet për persona të lënduar, ndërsa pritet ndërhyrje shtesë nëse situata do të përkeqësohet.
