Zelensky: Mijëra trupa të huaja mund të vendosen në Ukrainë si pjesë e garancive të sigurisë

Ukraina pret që mijëra trupa të huaja të vendosen si pjesë e garancive të sigurisë pas përfundimit të luftës, sipas deklaratave të Volodymyr Zelensky, një ditë pasi aleatët evropianë të Kievit u takuan për këtë çështje, duke shkaktuar kërcënime nga pala ruse.

Është e rëndësishme që po diskutojmë të gjitha këto. Patjetër që do të jenë mijëra, jo vetëm disa. Dhe ky është një fakt”, tha Zelensky gjatë një vizite në qytetin perëndimor ukrainas të Uzhhorod.

Dje, Presidenti francez Emmanuel Macron tha se 26 vende ishin zotuar të ofronin garanci sigurie për Ukrainën pas luftës, duke përfshirë forca ushtarake ndërkombëtare në tokë, det dhe ajër.

Ai më pas sqaroi se disa nga këto vende do të ofronin garanci jashtë vendit, për shembull duke ndihmuar në trajnimin dhe pajisjen e forcave ukrainase.

Paralajmërime nga Putini

Megjithatë, Presidenti rus Vladimir Putin ka paralajmëruar se çdo forcë perëndimore në Ukrainë do të jetë një “objektiv legjitim” për ushtrinë ruse.

“Nëse ndonjë forcë shkel atje, veçanërisht tani kur ka beteja, ne do t’i konsiderojmë ata një objektiv legjitim për ushtrinë ruse”, tha Putin në një fjalim në Forumin Ekonomik Lindor në Vladivostok, në Lindjen e Largët.

“Dhe nëse merren vendime për të arritur paqe, një paqe të qëndrueshme, atëherë thjesht nuk shoh asnjë arsye që ata të jenë të pranishëm në territorin e Ukrainës, pikë”, theksoi presidenti rus, duke shtuar se “askush nuk dyshon se Rusia do të respektojë plotësisht” garancitë e ardhshme të sigurisë për Ukrainën./vizionplus.tv