Vinicius është zëvendësuar me alien? Detajet që kanë ndezur teorinë konspirative
Një teori e pazakontë konspirative ka pushtuar rrjetet sociale në Brazil, këtë herë me në qendër yllin e Real Madridit, Vinicius Junior.
Pas pretendimeve të një fallxhoreje braziliane për një rrëmbim të mundshëm të futbollistëve brazilianë nga alienët gjatë Botërorit 2026, në rrjet është përhapur një tjetër teori edhe më e bujshme: se Vinicius nuk është më i njëjti person që luante për Real Madridin dhe se pas Kupës së Botës ai është zëvendësuar nga një sozi.
Teoria është ushqyer kryesisht nga ndryshimet në pamjen fizike të brazilianit. Përdorues të shumtë kanë krahasuar fotografi të Vinicius para dhe pas Botërorit, duke pretenduar se ndryshimet në fytyrë, trup dhe tatuazhe janë dëshmi se futbollisti është zëvendësuar.
Në fakt, mediat braziliane raportojnë se Vinicius ka kryer një procedurë estetike në fytyrë gjatë pushimeve, ndërsa pretendimet për tatuazhet janë përdorur në rrjetet sociale si një tjetër “argument” nga mbështetësit e teorisë.
Por historia nuk ndalet këtu. Në versionet më ekstreme të teorisë përmenden CIA, familja Rothschild, një elitë ndërkombëtare, alienë dhe madje edhe “reptilianë”. Disa postime pretendojnë se Vinicius është zhdukur ose është vrarë pas Botërorit dhe më pas është zëvendësuar për të vazhduar angazhimet e tij profesionale dhe publicitare.
Nuk ekziston asnjë provë që mbështet këto pretendime. Përkundrazi, Vinicius ka vijuar normalisht aktivitetin e tij me Real Madridin dhe Kombëtaren e Brazilit.
Edhe rrethi i lojtarit dhe Real Madridi i kanë injoruar plotësisht këto pretendime, duke i konsideruar si lajme të rreme dhe pa bazë.
Kështu, ajo që po qarkullon në rrjet mbetet një teori konspirative pa prova, e ndërtuar mbi ndryshimet në pamjen e futbollistit dhe krahasime fotografish.
