Vdes adoleshentja ne aksident, goditet nga autovetura

Ishte duke u kthyer në shtëpi pas një shëtitjeje me biçikletë me familjen, por xhiroja e mbrëmjes u mbyll në mënyrë fatale për një 17-vjeçare nga Shkodra. Denita Çuni u godit fort nga një makinë tip “Suzuki”, teksa i preu rrugën drejt shtëpisë. Përplasja ishte e fortë, duke shkaktuar plagë vdekjeprurëse për vajzën. Aksidenti ndodhi rreth orës  23:10 të së hënës, në aksin Shkodër – Koplik

Shoferi nuk u largua nga vendngjarja. Angjelin Gila 29 vjeç u shoqërua në Komisariatin  e Shkodrës ku deklaroi se ishte me shpejtësi, por nuk e ka parë 17-vjeçaren të kalonte, për shkak të errësirës. Ndërkohë dy aksidente te tjera u regjistruan gjatë të hënës në Korçë dhe Pogradec.

Në orët e pasdites katër makina janë përfshirë në një përplasje në aksin Pogradec – Qafë Thanë, fatmirësisht pa viktima. Pamjet tregojnë se goditja ka qenë tepër e fortë, duke i shkatërruar të katërta makinat njëra pas tjetrës. Sipas policisë, shkak i aksidentit u bë lagështira në rruge dhe shpejtësia e larte me te cilën lëviznin mjetet. Më herët gjatë ditës, një makinë me emigrantë që ktheheshin nga Greqia, doli nga rruga duke lënë të plagosur tre persona.