Gjykata e Posaçme Kundër Korrupsionit dhe Krimit të Organizuar ka dënuar me burg organizatorët e një grupi të strukturuar kriminal, që nëpërmjet mashtrimit online përmes call-center-ave në Shqipëri dhe Itali u vodhi shtetasve evropianë miliona euro, duke u premtuar investime në letra me vlerë dhe kriptovaluta.
Jusel Mici akuzohet për katër vepra penale, “Mashtrimi kompjuterik”, në dëm të disa personave, kryer në bashkëpunim, në formën e grupit të strukturuar kriminal, “Grupi i strukturuar kriminal”, “Pastrimi i produkteve të veprës penale ose veprimtarisë kriminale” dhe “Fshehja e të ardhurave”.
Mici u dënua me 12 vite burg, por duke përfituar nga gjykimi i shkurtuar u dënua përfundimisht me 8 vite.
Mendim Domi gjithashtu akuzohet për katër vepra penale, “Mashtrimi kompjuterik”, në dëm të disa personave, kryer në bashkëpunim, në formën e grupit të strukturuar kriminal, “Grupi i strukturuar kriminal”, “Pastrimi i produkteve të veprës penale ose veprimtarisë kriminale” dhe “Fshehja e të ardhurave”.
Domi u dënua me 11 vite burg, por duke përfituar nga gjykimi i shkurtuar përfundimisht u dënua me me 7 (shtatë) vjet e 4 (katër) muaj burgim.
Mendim Domi do të vuajë dënimin në burgun e sigurisë së lartë.
Po ashtu gjykata vendosi konfiskimin e një sërë pasurish në emër të të pandehurve dhe të afërmve të tyre, duke përfshirë:
Apartamente dhe prona të paluajtshme me sipërfaqe të konsiderueshme në zona të ndryshme të vendit.
Një llogari bankare me mbi 195 mijë euro dhe disa llogari të tjera me shuma në lekë.
Pasuri në emër të subjektit “Telex” sh.p.k, e sekuestruar gjatë hetimeve.
Pronësitë e bashkëpronarëve të tjerë të ligjshëm janë përjashtuar nga konfiskimi./vizionplus.tv
