Në natën e dytë të përleshjeve të pashembullta midis palestinezëve dhe policisë izraelite, vendet e shenjta në Jerusalem janë përgjakur. Numri i të plagosurve i ka kaluar 200 ndërsa tensionet vijnë në rritje pas trazirave për dëbimet e mundshme të palestinezëve nga toka e pretenduar, nga kolonët hebrenj.
Protestuesit hodhën gurë drejt policisë në Portën e Damaskut në Qytetin e Vjetër dhe oficerët u përgjigjën me granata, plumba gome dhe mjetë të tjera. Ndërsa ushtria izraelite deklaroi se një raketë u qëllua nga militantët palestinezë nga Rripi i Gazës i drejtuar nga Hamasi në Izrael.
Dhjetëra mijëra besimtarë muslimanë ishin mbledhur në xhaminë Al-Aqsa për natën e Kadrit, në kohën kur shpërthyen tensionet. Më herët, policia izraelite kishte ndaluar dhjetëra autobusë që po transportonin besimtarët në xhami dhe një numër palestinezësh u arrestuan.
Kryeministri i Izraelit Benjamin Netanyahu tha se vendi i tij po vepronte me përgjegjësi për të siguruar rend dhe ligj duke ruajtur lirinë e adhurimit. Ndërsa lideri palestinez Mahmoud Abbas dënoi ato që sipas tij ishin “sulmet mëkatare” të Izraelit.
Izraeli ka pushtuar Jeruzalemin Lindor që nga lufta e Lindjes së Mesme në vitin 1967 dhe e konsideron të gjithë qytetin, kryeqytetin e tij, megjithëse kjo nuk njihet nga shumica dërrmuese e bashkësisë ndërkombëtare.
Palestinezët pretendojnë Jeruzalemin Lindor si kryeqytetin e ardhshëm të një shteti të pavarur. Tensionet janë rritur edhe në lidhje me dëbimin e kërcënuar të familjeve palestineze në rrethin Shaikh Jarrah të Jeruzalemit Lindor.
Kombet e bashkuara thonë se Izraeli duhet të anulojë çdo dëbim dhe të përdorë “përmbajtje maksimale në përdorimin e forcës” kundër protestuesve. Lidhja e Shteteve Arabe i ka bërë thirrje bashkësisë ndërkombëtare që të ndërhyjë për të parandaluar çdo dëbim të detyruar ndërsa gjykata supreme e Izraelit do të hapë cështjen të hënën.
