Publikimi i të dhënave nga një prej bankave private më të mëdha në botë, Credit Suisse, ka nxjerrë në drite pasuritë e fshehura të klientëve të akuzuar si të përfshirë në tortura, trafik droge, pastrim parash, korrupsion dhe krime të tjera të rënda.
Në këtë skandal, janë ekspozuar detajet e llogarive të rreth 30 mijë klientëve në të gjithë botën, duke përfshirë edhe Shqipërinë. Por aktualisht nuk bëhen të ditur emrat konkrete. Mediat ndërkombëtare shkruajnë se në këto dhëna demaskohen përfituesit e më shumë se 100 miliardë frangave zvicerane.
Banka private në mënyrë të përsëritur mbante të hapura llogari bankare për një grup klientësh me rrezikshmëri të lartë në të gjithë botën, pavarësisht premtimeve gjatë dekadave të fundit se do të ndalonte klientët e dyshimtë dhe fondet e paligjshme.
Mediat e huaja sqaruan se disa llogari ishin të hapura që në vitet 1940, më shumë se dy të tretat u hapën që nga viti 2000, ndërsa shumë prej tyre ishin ende të hapura në dekadën e fundit dhe një pjesë mbeten aktive edhe sot.
Ato përfshijnë një trafikant qeniesh njerëzore në Filipine, një drejtues të bursës së Hong Kongut të burgosur për ryshfet, një miliarder që urdhëroi vrasjen e të dashurës së tij, si dhe politikanë të korruptuar nga Egjipti dhe Ukraina.
Gjithashtu nga të dhënat e publikuara u zbulua se një llogari në pronësi të Vatikanit u përdor për të shpenzuar 350 milion € në një investim të dyshimtë në Londër.
